विदेशमा दुःख पाएर फर्केर ३ वर्षमै ८ लाख कमाई

खोटाङको याम्खा ६ का डेगराज आचार्यलाई विदेश नजाउन्जेल लाग्थ्यो स्वदेशमा पैसा कमाउन कुनै कामै छैन जस्तो लाग्थ्यो । त्यही भएर २०६६ सालमा पैसा कमाउन हानिनुभयो विदेश । तर नेपालबाट रहरले गएको मरुभुमीमा उहाँ ३ वर्ष पनि टिक्न सक्नुभएन ।

लाहुरे भएर गाउँघरमा फर्किनुभएका डेगराज अहिले खेतवारीमा व्यस्त हुनुहुन्छ । ३ वर्षअघि आफनो ठाउँमा पैसा कमाउने केही काम नदेखेका डेगराजको आँखा विदेश पुगेपछि खुले । उहाँ भन्नुहुन्छ ‘गर्नु हो भने धेरै कुरा यहिँ गर्न सकिने रहेछ ।’ एक लाख १० हजार रुपैयाँ म्यानपावर कम्पनीलाई जिम्मा लगाएर कतार पुुगेका आचार्यले न भने अुनसारको काम पाउनुभयो न त दाम नै । काम र दाम दुवै चित्त बुुझ्दो नभएपछि आचार्य पुरानो सोच विदेश मै छोडेर नयाँ सोच लिएर गाउँ फर्किनुभयो  । ३ वर्ष कतारमा बस्दा विदेश जाँदा लागेको ऋण पनि तिर्न नसकेका डेगराज आचार्यले अहिले गाउँमै राम्रै कमाइ गरिरहनुभएको छ । त्यो पनि खेतीपाती गरेरै ।

आफ्नै गाउँमा तरकारी खेती गरेका डेगराजले अहिले विरुवा उमार्ने नर्सरी पनि बनाउनुभएको छ । ‘विदेशबाट फर्किने वित्तिकै त आफूले उमारेका विरुवा र तरकारी बजार लान लाज लाग्थ्यो’ उहाँले खेती गर्दाको अनुभव बाँड्दै भन्नुभयो  ‘अहिले त मेरो सबै थोक नै यही खेतीपाती नै भएको छ । ’ सुरुमा तरकारी बेच्न बजार पुुग्न समेत लाज मान्ने आचार्य आजकाल आफैं जिल्लाका आधा दर्जन बजारमा तरकारी बेच्न पुग्नुहुन्छ । खेतबारीमै गरिरहेको मेहनतले ३ वर्षको छोटो अवधीमै उहाँको परिचय फेरिएको छ । त्यति मात्रै होइन उहाँकोपरिचय अहिले जिल्लाकै नमुुना कृषि फर्म संचालकको बनेको छ । उहाँले उमारेका अनार, कागती, सुन्तला, निबुुवालगायत अमिलो जातका फलफुुलका विरुवा जिल्ला कृषि विकास कार्यलयले खरिद गर्छ भने किसानले पनि किन्छन । डेगराजको कृषि फर्ममा पुग्दा लसुुन, प्याज, आलु, टमाटर, खुुर्सानी, काउली, बन्दालगायत तरकारी फलेको भेटिन्छ ।

हिच्किचाउँदै सुरु गरेको खेतीबाट डेगराजले तीन वर्षमै ८ लाख रुपैयाँ कमाउनुभयो । ‘मेरो कमाइबाट म सन्तुष्ट छु’ डेगराज भन्नुहुन्छ ‘अल्छेपना र पढेलेखेकाले सानोतिनो काम गर्नुहुन्न भन्ने सोचले विगारेको रहेछ ।’
Source:Ujyalo Online